Желтоқсан айында Қазақстан машина жасаушыларының одағы сала кәсіпорындарын дамыту және қолдау, мемлекеттік органдармен өзара іс-қимыл жасау, сондай-ақ өндірістік белсенділікті ынталандыруға және кооперацияны кеңейтуге бағытталған бастамаларды іске асыру бойынша жүйелі жұмысын жалғастырды.
АЙДЫҢ НЕГІЗГІ ОҚИҒАЛАРЫ
5 желтоқсан
Қазақстан Республикасы Премьер-министрінің бірінші орынбасары Роман Склярдың төрағалығымен Үйлестіру кеңесінің кезекті отырысы өтті.
Отырыс барысында машина жасау саласын дамытудың жүйелі мәселелері, оның ішінде 2024–2028 жылдарға арналған машина жасауды дамыту жөніндегі кешенді жоспардың іске асырылу барысы, сондай-ақ Қазақстан машина жасаушыларының одағы 2025 жылы атқарған жұмысының қорытындылары қаралды.
5 желтоқсан
Одақ қатысушыларының бірқатар кәсіпорындары Қазақстан Республикасы Президентінің «Алтын сапа» сыйлығының, «Парыз» ұлттық сыйлығының және «Іскер» сыйлығының лауреаттары атанды. Аталған марапаттар кәсіпорындар өнімінің жоғары сапасын, басқарушылық шешімдердің тиімділігін және әлеуметтік жауапкершілік деңгейін растады.
11 желтоқсан
Қазақстан машина жасаушыларының одағы Басқарма төрағасының орынбасары Ерқанат Мақанов Қазақстан Республикасы Парламенті Сенатының Экономикалық саясат, инновациялық даму және кәсіпкерлік комитетінің отырысына қатысты.
Отырыс аясында Қарағанды облысының Саран қаласында өткен машина жасау саласын дамыту мәселелеріне арналған дөңгелек үстелдің қорытындысы бойынша қалыптастырылған ұсыныстар мен ұсынымдар қаралды.
18 желтоқсан
Қазақстан машина жасаушыларының одағы Басқарма төрағасы Мейрам Пішембаевтың төрағалығымен Қазақстан Республикасы «Атамекен» Ұлттық кәсіпкерлер палатасы Президиумының Машина жасау және металл өңдеу комитетінің отырысы өтті.
Отырыс барысында Одақтың 2025 жылғы қызметінің қорытындылары, сондай-ақ 2024–2028 жылдарға арналған машина жасау саласын дамыту жөніндегі кешенді жоспардың іске асырылу барысы тыңдалды.
Сонымен қатар, отырыста ҚР «Атамекен» ҰКП Президиумының Машина жасау және металл өңдеу комитетінің төрағасы болып Ерқанат Мақанов сайланды.
23 желтоқсан
Қазақстан машина жасаушыларының одағы Басқарма төрағасы Мейрам Пішембаев «QazaqGaz» ұлттық компаниясы ұйымдастырған отандық тауар өндірушілерді қолдау және дамыту мәселелеріне арналған дөңгелек үстелге қатысты.
Іс-шара аясында QazaqGaz компаниясының еншілес ұйымдары мен Одаққа мүше кәсіпорындар арасында офтейк-келісімшарттар мен келісімдерге қол қойылды.
29 желтоқсан
Қазақстан машина жасаушыларының одағы Басқармасының отырысында 2025 жылға арналған жұмыс жоспарының орындалу қорытындылары қаралып, 2026 жылға арналған қызметтің негізгі бағыттары мен басымдықтары бекітілді.
ӨҢІРЛІК ӨКІЛДЕРМЕН ЖҰМЫС
Желтоқсан айында негізгі тақырыптар мен мәселелер талқыланған 4 отырыс өткізілді:
1. Қазақстандық тауар өндірушілердің тізілімін енгізудің ағымдағы жағдайы туралы.
2. Атырау облысында алғашқы интеграцияланған газ-химия кешенін салу жобасы және оны іске асыруға отандық өндірушілердің қатысу тетіктері туралы.
3. «Майями SOLAR» ЖШС қызметінің таныстырылымы.
4. «Астана таразы зауыты» ЖШС қызметінің таныстырылымы.
5. «ПЛМ Урал» компаниялар тобының қызметінің таныстырылымы.
6. Қазақстан машина жасаушыларының одағы 2025 жылы атқарған жұмысы туралы ақпарат.
МЕМЛЕКЕТТІК, КВАЗИМЕМЛЕКЕТТІК ЖӘНЕ БАСҚА ДА ОРГАНДАРМЕН ЖҰМЫС
1. Қазақстан Республикасы Өнеркәсіп және құрылыс министрлігімен бірлесіп, Қазақстандық тауар өндірушілер тізілімін практикалық тұрғыда іске қосуды қамтамасыз ету, сондай-ақ бірқатар шешілмеген мәселелерді жою бойынша жұмыс жүргізілді.
2. Қазақстан Республикасы Атом энергетикасы агенттігімен атом электр станциясын салу жобаларын іске асыруға отандық өндірушілерді тарту мәселелері бойынша өзара іс-қимыл жалғасуда.
3. «Қазақстан темір жолы» ҰК» АҚ басшылығымен жұмыс кездесулері өткізілді. Кездесулер барысында ынтымақтастық мәселелері, өзара іс-қимыл туралы меморандумға қол қою, импортты алмастыруға арналған өнімдер пулын қалыптастыру, сондай-ақ 2026 жылға арналған сатып алынатын өнімдерге қажеттілік мәселелері талқыланды. «Қазақстан темір жолы» ҰК» АҚ импортты алмастыруға жататын өнімдер тізбесін одан әрі пысықтау үшін Одаққа жолдады.
4. «Қазақтелеком» АҚ филиалы – «Телеком Комплект» дирекциясымен кеңес өтті. Кеңес аясында «Қазақтелеком» АҚ кәсіпорындары сатып алатын өнімдер бойынша импортты алмастыру үдерістеріне Одаққа мүше отандық өндірушілердің қатысуын кеңейту мақсатында Жаңа өндірістерді құруға жәрдемдесу бағдарламасы шеңберінде бірлескен жұмысты жалғастыру туралы келісімге қол жеткізілді.
5. Қазақстан машина жасаушыларының одағы XII Форумының қорытындылары бойынша әзірленген ұсынымдарды іске асыру мақсатында мемлекеттік органдармен өзара іс-қимылды жалғастыруда. Аталған ұсынымдар келесі бағыттарды қоса алғанда, кең ауқымды мәселелерді қамтиды:
- отандық кәсіпорындарды шикізатпен қамтамасыз ету;
- Өнеркәсіптің ұлттық ақпараттық жүйесін енгізу;
- ЭКСЖ бойынша Ұлттық жобаны іске асыруға отандық тауар өндірушілердің қатысуы;
- өнеркәсіптік робототехниканы енгізуге бағытталған бағдарламалық құжатты қабылдау, сондай-ақ экономиканың басым салалары үшін жабдықтар мен автоматтандыру құралдарын өндіруді ынталандыру арқылы еңбек өнімділігін арттыру.
ХАЛЫҚАРАЛЫҚ ЫНТЫМАҚТАСТЫҚ
18 желтоқсан
Қазақстан машина жасаушыларының одағы мен Қытайдың Халықаралық сауданы дамыту жөніндегі кеңесінің (CCPIT) Машина жасау комитеті өкілдерінің қатысуымен онлайн-кездесу өтті. Кездесу барысында Қазақстан машина жасаушыларының одағы Басқарма төрағасының орынбасары Ерқанат Мақанов пен Одақтың Атқарушы дирекциясының директоры Талғат Базарбеков CCPIT өкілдерімен Қазақстан мен Қытайдың машина жасау кәсіпорындары арасындағы ынтымақтастықты дамыту, іскерлік байланыстарды кеңейту мәселелерін талқылады.
2025 жылғы желтоқсан айының қорытындысы бойынша Қазақстанның машина жасаушылар одағы салалық кәсіпорындардың мүдделерін Үкімет пен Парламент деңгейінде белсенді түрде таныстырып, кооперациялық байланыстарды кеңейтуге, сондай-ақ отандық машина жасаудың ішкі және сыртқы нарықтардағы ұстанымын нығайтуға жәрдемдесті.