«Өнеркәсіпті дамыту қоры» АҚ «Бәйтерек» ұлттық басқарушы холдингінің және «Даму» кәсіпкерлікті дамыту қоры» АҚ-ның қолдауымен өңдеу өнеркәсібіндегі жұмыс істеп тұрған шағын және орта бизнес кәсіпорындарының өндірістік қуаттарын жаңғыртуға арналған лизингтік қаржыландыру бағдарламасын іске асыруды жалғастыруда.
Қордың мәліметінше, бағдарлама шағын және орта бизнес субъектілерін техникалық жарақтандыру және қайта жарақтандыруға, жаңа өндірістік жабдықтарды сатып алуға, сондай-ақ кәсіпорындардың өндірістік қуаттарын кеңейтуге қолдау көрсетуге бағытталған.
Бағдарлама аясындағы лизингтік қаржыландыру кезең-кезеңімен жүзеге асырылады. Бірінші кезеңнің жалпы бюджеті 5 млрд теңгені құрайды. Кейінгі кезеңдер бойынша қаражат бөлінген жағдайда бұл туралы қосымша ақпарат берілетін болады.
Бағдарламаның негізгі шарттары:
- Бір лизинг алушыға немесе компаниялар тобына берілетін қаржыландыру көлемі – 1 млн теңгеден 300 млн теңгеге дейін.
- Сыйақы мөлшерлемесі – 12,6%.
- Қаржыландыру мерзімі – 3 жылдан 5 жылға дейін.
- Лизинг алушының меншікті қаражатпен қатысу үлесі – лизинг нысаны құнының 10%-ы.
- Лизинг алушының операциялық қызмет мерзімі өтінім берілгенге дейінгі толық күнтізбелік жылды қамтуы тиіс.
- Лизинг нысаны ретінде бұрын пайдаланылмаған, өтінім берілген күнге дейін шығарылғанына 3 жылдан аспаған, толық кедендік рәсімдеуден өткен жаңа жабдық қабылданады. Бұл бағдарлама аясында өздігінен жүретін техника мен медициналық жабдықтарды сатып алуға жол берілмейді.
- Лизинг нысанын сатушы немесе жеткізуші Қазақстан Республикасының резиденті болып табылатын отандық өндіруші зауыт немесе жабдық өндірушінің ресми дистрибьюторы (дилері) болуы тиіс.
- Сыйақы төлемдері бойынша жеңілдік кезеңі қарастырылмаған. Негізгі борыш бойынша жеңілдік мерзімі қаржылық лизинг шартына қол қойылған күннен бастап 6 айға дейін белгіленеді.
- Қамтамасыз ету ретінде лизинг нысаны және заңды тұлға болып табылатын лизинг алушының бенефициарлық меншік иелерінің жеке кепілдігі қабылданады. Қосымша кепілзат талап етілмейді.
- Қарызды өтеу ай сайын тең үлестермен жүзеге асырылады.
Сонымен қатар бағдарлама аясында лизингтік қаржыландыру алуға кедергі болатын бірқатар шектеулер бекітілген. Атап айтқанда, мерзімі өткен салық берешегінің болуы, алкоголь және темекі өнімдерін өндіруге байланысты қызмет түрлері, сондай-ақ бағдарлама талаптарына сәйкес келмейтін өзге де қызмет бағыттары қаржыландыруға жіберілмейді.
Бағдарламаға қатысуға үміткерлерді іріктеу Қазақстанның барлық өңірлерінде жұмыс істейтін «Даму» кәсіпкерлікті дамыту қоры» АҚ филиалдары арқылы жүзеге асырылады.
Іріктеуден өткен жобаларды қаржыландыруды «Өнеркәсіпті дамыту қоры» АҚ жүзеге асырады.
Дереккөз: tengrinews.kz
