АҚШ президенті Дональд Трамп Еуропамен сауда шиеленісін күшейтіп отыр. Ол АҚШ-тың Гренландияны иелену ниетіне қарсы шыққан және осы аумақты қолдаған елдерге жазалау сипатындағы кедендік баж салығын енгіземін деп қоқан-лоқы жасады. Бұл жағдай Германияның автомобиль өнеркәсібі тарапынан қатаң ескертулерге себеп болды.

Германия автомобиль өнеркәсібі қауымдастығы (VDA) ұсынылып отырған баж салығы — 1 ақпаннан бастап 10%, ал келісімге қол жеткізілмеген жағдайда 25%-ға дейін өсуі — еуропалық автокөлік өндірушілер үшін «аса ауқымды» шығындарға әкелетінін мәлімдеді. Бұл АҚШ-тың ЕО-дан экспортталатын автокөліктерге салынған қолданыстағы 15 пайыздық баж салығының салдарын одан әрі күшейтпек. VDA президенті Хильдегард Мюллер Брюссельді үйлестірілген әрі стратегиялық жауап қайтаруға шақырды.

Неміс өндірушілері қазірдің өзінде қысымға ұшырап отыр: Volkswagen 2025 жылы баж салығынан келетін шығынды 5 млрд еуроға дейін бағалап отыр, ал Mercedes-Benz, Porsche және BASF компаниялары да елеулі шығынға тап болған.

Неміс бизнес көшбасшылары Трамптың геосаяси талаптарын экономикалық санкциялармен байланыстыруын жол беруге болмайтын жағдай деп бағалап, мұндай талаптарға көну болашақта одан да үлкен қысымға алып келетінін ескертті.

Бұл дау қазір АҚШ пен ЕО арасындағы кең ауқымды сауда келісіміне қауіп төндіруде. Заң шығарушылар шілде айында 15% баж салығын бекіту жөніндегі келісімді ратификациялауға тосқауыл қоюы мүмкін екенін мәлімдеді. Ал Еуропарламент өкілі Манфред Вебер Гренландияға қатысты қауіптерге байланысты бұл келісімді мақұлдау енді мүмкін емес екенін айтты.

Қарсылық АҚШ-тың болат пен алюминийге салынатын баж салығын ЕО-ның басқа да тауарларына кеңейткеннен кейін күшейе түсті. Сонымен қатар, АҚШ-тың сауда өкілі Джеймисон Грир Еуроодақты міндеттемелерін орындамады деп айыптап, бұл келіссөздердің созылып кету қаупін арттырып отыр.

Дереккөз: metallurgprom.org