Ақмола облысы кәсіпорындарындағы техникалық мамандар тапшылығы біртіндеп азайып келеді. Мемлекет басшысы жариялаған «Жұмысшы мамандықтар жылы» бұл бағыттың дамуына қосымша серпін берді: жұмысшы және инженерлік мамандықтар бойынша гранттар саны артты, ал мамандықтардың беделі айтарлықтай өсті. Бүгінде студенттер оқу барысында өз білімдерін қай жерде қолдана алатынын түсінсе, өңір кәсіпорындары көптен күткен жас мамандармен толықтырылуда, деп хабарлайды Ішкі саясат басқармасының ресми сайты.

Кадр даярлаудың табысты үлгісінің бірі – Көкшетау жоғары техникалық колледжі. Бұл – өңірдегі ең заманауи білім беру мекемелерінің бірі, мұнда оқу «тәжірибе арқылы білім беру» қағидаты бойынша ұйымдастырылған. Колледж базасында әлемдік деңгейдегі жабдықтармен жабдықталған 20 құзыреттілік орталығы жұмыс істейді. Мұнда машина жасау, құрылыс, энергетика, IT және басқа да бағыттар бойынша мамандар даярланады. Студенттер «Тыныс» АҚ, «КАМАЗ Инжиниринг», Қазақстандық агроинновациялық корпорациясы сияқты кәсіпорындарда оқумен қатар жұмыс істей отырып, дуалды оқыту жүйесі бойынша білім алады.

Тәжірибе арқылы білім беру

Колледж әдіскері Тілек Сәбитованың айтуынша, оқу орны бүгінде үш деңгейлі даярлықты қамтамасыз етеді: жұмысшы біліктіліктері, техникалық және кәсіптік білім беру, сондай-ақ қолданбалы бакалавриат.

– Бүгінде бізде шамамен 2500 студент білім алады, 200-ге жуық оқытушы мен өндірістік оқыту шеберлері еңбек етеді. Даярлық 26 мамандық пен 100-ден астам біліктілік бойынша жүргізіледі. Көптеген студенттер, әсіресе дуалды оқыту жүйесі бойынша білім алғандар, қалада қалып жұмысқа орналасады. Өндірістік тәжірибе – өзіңді көрсетуге мүмкіндік, әрі көбінесе студенттер тәжірибе кезінде-ақ кәсіпорындарға жұмысқа шақырылады, – дейді әдіскер.

Колледжде цифрлық технологиялар белсенді енгізілуде: мыңнан астам компьютер, VR-жабдықтар, 3D-принтерлер және оқу тренажерлары студенттердің заманауи дағдыларды меңгеруіне мүмкіндік береді. Сонымен қатар білім беру ортасы ерекше білім беру қажеттіліктері бар студенттерге де бейімделген.

IT бағыты алдыңғы қатарға шығуда

Колледж WorldSkills чемпионаттарында да жоғары нәтижелер көрсетіп келеді. Өңірлік кезеңнің жеңімпазы Александр Цалко болашақ мансабын IT саласымен байланыстыруды жоспарлап отыр.

– Біз бүгінде ауыл шаруашылығы мен картографияда қолданылатын дрондармен жұмыс істеуді үйреніп жатырмыз. Колледж техникалық бағыттағы оқу орны болғанымен, қазіргі таңда IT бағытына сұраныс өте жоғары, мұны тәжірибе жүзінде сезінудеміз, – дейді ол.

Түлектер жұмысшы мамандықтарының беделі артқанын растайды

Жұмысшы мамандықтарының беделі шынымен өсіп келе жатқанын колледж түлектері де атап өтуде. «Машина жасау технологиясы» мамандығы бойынша білім алған Максим Макулаков бүгінде өндірістік кәсіпорындардың бірінде еңбек етеді.

– Мен мамандық таңдауыма бірде-бір рет өкінген емеспін. Кезінде ата-анам техникалық бағыттың болашағы зор екенін айтқан болатын. Бүгінде бұл шындыққа айналды: гранттар көбейді, жалақы өсуде, мемлекет қолдау көрсетіп жатыр. Жұмысшы мамандықтары барған сайын тартымды бола түсуде, – дейді Максим.

Бизнес пен білім беру байланысы

Колледждің әлеуметтік серіктестері мұндай өзара іс-қимылдың маңыздылығын ерекше атап өтеді. «Қазақстандық Агро Инновациялық Корпорация» ЖШС өндіріс бөлімінің басшысы Қайрат Дүйсенбековтің айтуынша, соңғы жылдары кәсіпорындарға жас мамандардың келуі айтарлықтай артқан, бүгінде жастар жұмысшы мамандықтарын жиі таңдап, өндіріске келуге қызығушылық танытуда.

– Қазіргі таңда жұмысшы мамандықтарына сұраныс бұрын-соңды болмаған деңгейде жоғары. Біз көп көлемде техника шығарамыз және бізге білікті мамандар қажет. Біздің кәсіпорында тәжірибеден өтетін студенттердің 80 пайызы жұмысқа қалып қояды. Кәсіпорындағы 360 қызметкердің шамамен 30-ы – колледжден кейін келген жас мамандар. Біз оларға жұмыс орындарын ұсынып, кәсіби өсу мен біліктілікті арттыруға мүмкіндік береміз, – деді ол.

Айта кету керек, Көкшетау жоғары техникалық колледжі өңірдегі жұмысшы кадрлар тапшылығы мәселесін шешудегі маңызды буынға айналды. Оқу орны заманауи білім беру технологияларын, тәжірибеге бағытталған оқытуды және бизнес-пен тығыз ынтымақтастықты ұштастыра отырып, еңбек жолының басында-ақ өндірісте сенімді жұмыс істей алатын мамандар даярлап келеді.

Фото: Ақмола облысының Ішкі саясат басқармасы

Источник: tengrinews.kz