Қазақстанның солтүстігіндегі өнеркәсіп тұрақты оң динамика көрсетіп, өңір экономикасындағы өз позициясын барған сайын нығайтып келеді. 2025 жылдың қорытындысы бойынша өнеркәсіп өндірісінің көлемі 942,4 млрд теңгені құрады, деп хабарлайды Petropavlovsk.news.

2025 жылы өнеркәсіп өндірісінің көлемі 2024 жылдың деңгейінен 19,9%-ға жоғары болды. Ауқымы жағынан өнеркәсіп саласы ауыл шаруашылығы көрсеткіштеріне жақындап келеді. Бұл өңірдің негізінен аграрлық аймақтан аграрлық-индустриялық өңірге біртіндеп ауысып жатқанын көрсетеді.

Өсім қолданыстағы кәсіпорындардың тұрақты жұмысы және жаңа инвестициялық жобалардың іске асырылуы есебінен қамтамасыз етілді. Негізгі драйвер ретінде өңдеу өнеркәсібі қалып отыр, оның үлесіне саланың жалпы құрылымының 87%-ы тиесілі. Саланың көлемі 820,1 млрд теңгеге жетсе, нақты көлем индексі 123,2%-ды құрады. Бұл нәтижеге тамақ өнеркәсібі мен машина жасау кәсіпорындары негізгі үлес қосты.

Әсіресе машина жасау секторы айтарлықтай өсім көрсетуде. Мәселен, «ЗИКСТО» ЖШС өндіріс көлемін 35,8%-ға арттырып, 169,8 млрд теңгеге жеткізді. Бір жылда кәсіпорын 149 жолаушылар вагонын шығарды. Сонымен қатар «СТ ЭССЕМБЛИ» ЖШС де елеулі өсім көрсетіп, өндіріс көлемін 41%-ға ұлғайтып, 85,7 млрд теңгені құрады. «Петропавл электротехникалық зауыты» ЖШС-де өсім 27,2%-ға, ал «Авагро» ЖШС-де 53,8%-ға жетті.

Кәсіпорындардың тұрақты жүктемесі мен өндірістік әлеуетінің жоғары екенін тапсырыстар портфелінің ұлғаюы да көрсетеді. Жыл қорытындысы бойынша ол 12,7%-ға өсіп, 2024 жылғы 262,6 млрд теңгемен салыстырғанда 300,7 млрд теңгені құрады. Бұл өндірісті одан әрі кеңейтуге және өңірдің өнеркәсіптік әлеуетін нығайтуға берік негіз қалыптастырады.

2026 жылы да оң үрдіс сақталуда. Қаңтар-ақпан айларының қорытындысы бойынша өңірдегі өнеркәсіп өндірісінің көлемі 162,7 млрд теңгеге жетті. Оның ішінде өңдеу өнеркәсібінің өндіріс көлемі 135,1 млрд теңгені құрап, 35,3%-ға артты.

Өңірде ағымдағы жылдың қорытындысы бойынша өнеркәсіп өндірісінің көлемі 1 трлн теңгеден асады деп күтілуде. Бұл көрсеткішке қолданыстағы кәсіпорындардың жүктемесін арттыру және өңдеу өнеркәсібіндегі жаңа жобаларды іске қосу есебінен қол жеткізу жоспарланып отыр. Сонымен қатар инвестициялар өндірісті әртараптандыруға, жаңа жұмыс орындарын ашуға және салық базасын кеңейтуге ықпал етіп, саланың дамуына қосымша серпін беруде.

Осының барлығы Солтүстік Қазақстан облысының өнеркәсібі өңірдің экономикалық өсімінің негізгі факторларының біріне айналып келе жатқанын дәлелдейді.

Дереккөз: pkzsk.info