«Қазақстанның машина жасаушыларының одағы» ЗТБ алаңында өңірлік өкілдер мен сала серіктестерінің қатысуымен 36-шы отырыс өтті. Іс-шара барысында машина жасау саласын дамытудағы өзекті мәселелер, отандық өндірушілерді қолдау шаралары және жұмысшылардың әлеуметтік қорғалуы талқыланды.
«Халық-Life» АҚ бас менеджері Руслан Құрманғалиев зейнетақы аннуитеті туралы ақпарат берді. Бағдарлама Қазақстан нарығында 15 жылдан астам уақыттан бері жұмыс істеп келеді және азаматтарды әлеуметтік қорғаудың сенімді құралы ретінде танылды. Ол зейнетақы төлемдерін белгіленген мерзімнен бұрын алуға мүмкіндік береді: ерлер зейнет жасына шыққанға дейін 8 жыл бұрын, әйелдер – 10 жыл бұрын жинақтарын пайдалана алады.
Зейнетақы аннуитеті Бірыңғай жинақтаушы зейнетақы қорындағы қаражатты сақтандыру компаниясына аударып, өмір бойы ай сайынғы төлемдерді кепілді түрде алуға мүмкіндік береді. Бұл тұрақты табыс пен болашақтағы қаржылық тәуелсіздікті қамтамасыз етеді. Бағдарлама Қазақстан Республикасы Ұлттық банкінің лицензиясы негізінде жүзеге асырылады және Қаржы нарығын реттеу және дамыту агенттігі тарапынан реттеледі. Барлық клиенттерге мемлекет кепілдігі беріледі, ал бағдарлама талаптары халықаралық стандарттарға сәйкес.
Зейнетақы аннуитеті – тек қаржылық құрал ғана емес, сонымен қатар азаматтардың болашағын жоспарлауға көмектесетін және елдегі әлеуметтік қорғалуды арттыратын тиімді әлеуметтік қолдау тетігі.
«Өскемен конденсатор зауыты» ЖШС техникалық саясат жөніндегі директорының орынбасары Николай Ершов отырысқа қатысушыларды кәсіпорын шығаратын өнімдер мен бұйымдардың номенклатурасымен таныстырды. Зауыт энергетикалық жүйелер мен өнеркәсіптік кәсіпорындарға арналған электротехникалық жабдықтарды қазіргі заманғы техникалық, экономикалық және экологиялық талаптарға, сондай-ақ халықаралық қауіпсіздік стандарттарына сәйкес өндіреді.
Кәсіпорын өнімдері энергия ресурстарын тиімді әрі үнемді пайдалануға, берілетін және тұтынылатын электр энергиясының сапасын арттыруға, шығындарды азайтуға және энергетикалық инфрақұрылымның сенімділігін қамтамасыз етуге ықпал етеді.
Зауытта инновациялық технологияларды енгізуге, өндірісті жергіліктендіруді арттыруға және экспорттық әлеуетті кеңейтуге ерекше назар аударылады. Кәсіпорын отандық және шетелдік серіктестермен белсенді ынтымақтасып, жаңа өнім түрлерін әзірлейді және қолданыстағы өндірістік желілерді жаңғыртады.
Қазақстан машина жасаушыларының одағы Басқарма төрағасының орынбасары Ерқанат Мақанов Одақ бірқатар кәсіпорындармен – «Келет» АҚ, «Elcos» ЖШС, «Сантехпром» ЖШС және «Павлодар құбыр илемдеу зауыты» ЖШС-мен бірлесіп, машина жасаушыларды қара металлургия өнімдерімен қамтамасыз ету мәселелері бойынша жүйелі жұмысты бастағанын хабарлады.
Оның айтуынша, «Qarmet» АҚ өкілдерімен келіссөздер жүргізіліп, ынтымақтастық пен компанияның отандық өндірушілерді қара металлургия өнімдерімен қамтамасыз етуге дайын екендігі жөнінде уағдаластыққа қол жеткізілді. Алдағы екі апта ішінде аталған кәсіпорындар «Qarmet» АҚ-мен қара металлургия өнімдерін жеткізу бойынша тікелей келісімшарттар жасауға өтінім береді. Сонымен қатар, компания өз өнімін көтерме бағамен жеткізу мүмкіндігін қарастыруда, бұл машина жасаушылардың түпкі өнімдерінің өзіндік құнын төмендетуге ықпал етеді.
Жеке мәселе ретінде өнімді жеткізу инфрақұрылымын дамыту аталды. Бүгінде жеткізу негізінен теміржол көлігі арқылы жүзеге асырылады, алайда «Qarmet» АҚ Қазақстан аумағында автомобильдік жеткізу инфрақұрылымын құру мүмкіндігін қарастыруға дайын. Бұл жеткізудің жеделдігін және қолжетімділігін айтарлықтай арттырады.
Ерқанат Мақанов саланың қара металлургия өнімдеріне қажеттілігін екі бағытта талдаудың маңыздылығын атап өтті: біріншісі – бүгінде өндірілетін өнім көлемін айқындау, екіншісі – «Qarmet» АҚ әзірге өндірмейтін, бірақ сұранысқа ие өнім түрлерін анықтау. Мұндай тәсіл ассортиментті кеңейту стратегиясын әзірлеуге және машина жасаушыларды қажетті ресурстармен тұрақты қамтамасыз ету жүйесін құруға мүмкіндік береді.
«Біз өзара тиімді ынтымақтастық моделіне қол жеткізуіміз маңызды. Машина жасаушылар өнімді әділ әрі қолайлы шарттармен алуы тиіс, ал металлургтер өз кезегінде нарық сұранысына сүйене отырып, өнім түрлерін кеңейтіп, өндірісті ұлғайтуы қажет», – деп атап өтті ол.
Өз сөзінің соңында Ерқанат Мақанов әріптестерін келе жатқан Машина жасаушы күнімен құттықтап, әрбір маманның еліміздің өнеркәсіптік әлеуеті мен экономикасын дамытуға қосқан үлесін ерекше атап өтті.
