«Қазақстанның машина жасаушыларының одағы» ЗТБ-да өңірлік өкілдермен 31-ші отырыс өтті. Онда машина жасау кәсіпорындарының өзара іс-қимылы мен саланы дамытудың өзекті мәселелері қаралды.
Күн тәртібінің негізгі мәселелерінің бірі Өзектендірілген мемлекеттік сметалық-нормативтік каталог (ӨМСК-3) «Құрылыс конструкцияларының, бұйымдары мен материалдарының тізбесі» Қазақстан Республикасының сметалық-нормативтік базасына өнімді енгізу үшін «ҚазҚСҒЗИ»АҚ-ға құжаттарды тапсыру тәртібі болды.
Қазақстан машина жасаушыларының одағы Басқарма төрағасының орынбасары Ерқанат Мақанов құжаттың отандық өндірушілер үшін маңыздылығын атап өтті:
«ӨМСК-3 тізбесі құрылыс саласында жобалау-сметалық құжаттаманы әзірлеу кезінде қолданылады. Оны «Энергетикалық және коммуналдық секторларды жаңғырту» ұлттық жобасы аясында да пайдалану жоспарлануда. Отандық кәсіпорындар үшін бұл нарыққа интеграциялаудың маңызды құралы: қазақстандық өндірушілердің тізіліміне енгізу үшін өтінім беру кезеңінде өнім кодын беру жоспарлануда», - деп атап өтті Ерқанат Мақанов.
«ҚазҚСҒЗИ» АҚ Астана филиалының Құрылыстағы нормалау орталығының директоры Арман Хасен отырысқа қатысушыларға құжаттарды тапсыру тәртібін түсіндіріп, өнімді базаға енгізу рәсіміне қатысты ең өзекті сұрақтарға жауап берді.
Бұл ретте Одаққа қатысушылар бірқатар проблемалық тұстарды атап өтті. Бұл құжаттарды тапсыру бойынша нақты нұсқаулықтардың болмауы, кері байланысты ұзақ күту және ұсынылған құжаттарды бірнеше рет пысықтау қажеттілігі, өнімге қойылатын ашық емес талаптар, өндірушілердің шикізатқа, логистика мен энергияға нақты шығындарын көрсетпейтін орташа бағаларды есепке алу.
Сондай-ақ, отырыс аясында «Теміртау құю зауыты» ЖШС директоры Вячеслав Буйницкий кәсіпорынның мүмкіндіктерін таныстырды. Зауыт тау-кен өнеркәсібінде, қиыршық тас зауыттарында және карьерлерде қолданылатын ұсақтау және ұнтақтау жабдықтары үшін қосалқы бөлшектерді өндіруге маманданған. Кәсіпорын 3 тоннаға дейін құю қуатына ие, газдандырылған модельдер бойынша құю технологиясын қолданады, сондай-ақ реверс-инжиниринг және бөлшектерді механикалық өңдеу қызметтерін көрсетеді. Барлық өнімдер зертханалық сынақтарды қоса алғанда, көп сатылы сапа бақылауынан өтеді.
Қазақстанның машина жасаушылары одағының өңірлік өкілдерімен отырыстары апта сайын өткізіледі және тәжірибе алмасу, өзекті мәселелерді талқылау, елдің машина жасау саласын дамытуға бағытталған шешімдерді әзірлеу үшін маңызды алаң болып табылады.
