«Қазақстанның машина жасаушыларының одағы» ЗТБ-да (ҚМЖО) өңірлік өкілдермен 30-шы отырыс өтті. Қатысушылар өнеркәсіптік ынтымақтастықтың негізгі мәселелерін талқылап, отандық машина жасау кәсіпорындарының бірінің өнімдерімен танысты.
Отырыс аясында Еуразиялық экономикалық комиссия Өнеркәсіптік саясат департаменті директорының орынбасары Георгий Арзуманян Еуразиялық экономикалық одақ (ЕАЭО) шеңберіндегі кәсіпорындардың өнеркәсіптік кооперациясын қаржылық қолдау тетігін ұсынды. Бұл тетік 2024 жылдың шілдесінде үкіметаралық деңгейде бекітілді.
Георгий Арзуманянның айтуынша, бұл бастаманың негізгі мақсаты – технологиялық дамуды ынталандыру, ЕАЭО елдері аумағында өндірістің жаңа үлгілерін құру және қосылған құн тізбектерін қалыптастыру. Бағдарламаға қатысу шарттарының бірі – ЕАЭО-ға мүше кемінде үш мемлекеттің кооперациясы, сонымен қатар өндірілетін өнім одақ елдерінде өнеркәсіптік шығу тегіне ие болуы тиіс.
Тетікті іске асыруға Қазақстанның 15 қаржы ұйымы мен институттары қатыса алады, бұл кәсіпкерлердің бірлескен жобаларды қаржыландыруға қолжетімділігін кеңейтуге мүмкіндік береді.
Отырыс аясында Қазақстандағы байланыс кабельдік муфталарын шығаратын жалғыз өндіруші «Sigma Corporation» ЖШС өкілдері компания қызметін таныстырды. Сату бөлімінің басшысы Артем Михайловский мен сапа менеджменті бөлімінің басшысы Александра Китаева кәсіпорынның өнім желісін және номенклатурасын ұсынып, оның бәсекелік артықшылықтары мен өндірісті кеңейту жоспары туралы айтты.
Кәсіпорын Қарағанды облысының Саран қаласында орналасқан және 500-ге дейін өнім атауын шығарады. Жеткізу географиясы Қазақстан, Ресей, Қырғызстан, Әзірбайжан және Моңғолияны қамтиды. Негізгі тұтынушылар ERG компаниялар тобы, Qarmet, «Қазақтелеком» АҚ, Kazakhmys, Kazzinc, «Богатырь Көмір» ЖШС, «Қазақстан темір жолы» ҰК» АҚ болып табылады.
Өз кезегінде ҚМЖО атқарушы дирекциясының директоры Талғат Базарбеков қатысушыларды Одақтың өткен аптада атқарған жұмысы туралы хабардар етті. Атап айтқанда, Қазақстан машина жасаушыларының XII форумының қорытындысы бойынша отандық кәсіпорындарды қолжетімді шикізатпен қамтамасыз ету жөніндегі ұсыныстар пысықталуда.
Апта ішінде ҚР Өнеркәсіп және құрылыс министрлігінің Өнеркәсіп комитеті мен Өнеркәсіптік саясат департаментінің, сондай-ақ «Qazindustry» АҚ өкілдерімен кездесулер және онлайн-кеңестер өткізілді. «Өнеркәсіптік саясат туралы» ҚР заңына өзгерістер енгізу мәселесі талқылануда. Қолданыстағы шикізат тауарлары тізіміне түсті металлургия өнімдері енгізілген, алайда машина жасау кәсіпорындары үшін қара металлургия шикізаты өзекті болып қала береді. Тізімді кәсіпорындардың өтінімдері негізінде емес, отандық өндіріс талдауына сүйене отырып қалыптастыру жоспарлануда.
Сонымен қатар, қазақстандық кәсіпорындарды қолжетімді ресурстармен қамтамасыз етуді басым міндет ете отырып, шетелге жеткізілетін шикізат бағасы жөніндегі ақпаратты нақтылау жұмыстары жүргізілуде.
Бұдан бөлек, ҚР Өнеркәсіп және құрылыс министрлігімен және «Қазақстан темір жолы» ҰК» АҚ-мен бірлесіп, вагондарды күрделі жөндеу кезінде отандық өндірістің жаңа қосалқы бөлшектерін пайдалануға қатысты жылжымалы құрамды техникалық пайдалану, қызмет көрсету және жөндеу ережелеріне өзгерістер енгізу мәселелері пысықталуда.
