«Қазақстан машина жасаушыларының одағы» ЗТБ алаңында өңірлік өкілдер, машина жасау кәсіпорындары мен салалық серіктестер қатысуымен 2026 жылғы жетінші онлайн-отырыс өтті. Отырыстың негізгі тақырыбы – шикізаттық емес өнім экспорттаушыларын мемлекеттік қолдау шаралары болды.

Отырыс барысында «Қазақстанның экспорттық-кредиттік агенттігі» АҚ Саудалық қаржыландыру және субсидиялау департаменті директорының орынбасары Асхат Абай және Сақтандыру және кепілдендіру департаментінің бас менеджері Динара Қабдушева Агенттік жүзеге асыратын қолдау құралдарын таныстырды.

«Қазақстанның экспорттық-кредиттік агенттігі» АҚ – «Бәйтерек» ҰИХ» АҚ-ның 100% еншілес компаниясы және шикізаттық емес экспортты дамыту мен ілгерілету саласындағы ұлттық даму институты. Агенттік өңдеуші сектордағы қазақстандық өндірушілерді қолдауға бағытталған 20-дан астам сақтандыру, кепілдік және қаржылық қызмет түрлерін ұсынады.

Таныстырылым аясында экспорттық мәмілелерді кепілдендіру, экспорттық кредиттерді сақтандыру, экспорт алдындағы қаржыландыру, қарыздарды сақтандыру және сауда қаржыландыру құралдары егжей-тегжейлі қарастырылды.

Төлемді кейінге қалдыруды және қысқа мерзімді дебиторлық берешекті сақтандыру мәселесіне ерекше назар аударылды. Бұл экспорттаушыларды шетелдік контрагенттердің міндеттемелерін орындамау тәуекелінен қорғауға мүмкіндік береді. Сақтандыру жағдайы туындаған кезде Агенттік Қазақстан Республикасының заңнамасына сәйкес шығын сомасының 90%-ына дейін өтейді.

Сонымен қатар қатысушыларға екінші деңгейлі банктер арқылы жылдық мөлшерлемесі 12,6%-ға дейінгі жеңілдетілген кредит алу мүмкіндігін қарастыратын экспорт алдындағы қаржыландыру тетіктері таныстырылды. Қаржыландыру мерзімі – бір жылға дейін, аралық өтеусіз.

Сондай-ақ шетелдік банктерді жеңілдетілген қаржыландыру арқылы қазақстандық тауарларды импорттаушыларды кейіннен кредиттеуді көздейтін сауда қаржыландыру мүмкіндіктері атап өтілді. Бұл тетік экспорттаушыларға тауарды жөнелткеннен кейін қысқа мерзімде төлем алуға және төлемеу тәуекелдерін азайтуға мүмкіндік береді.

Агенттік шетелдік импорттаушыларды іздестіруге жәрдем көрсетеді және Ресей Федерациясында, Өзбекстанда, Тәжікстанда, Қырғызстанда, Қытайда, Грузияда, Түркияда және Әзербайжанда өкілдіктері бар.

Отырыс соңында Қазақстан машина жасаушылар одағы Атқарушы дирекциясының директоры Талғат Базарбеков 2–3 сәуірде өтетін XIII Қазақстан машина жасаушыларының форумына дайындық барысы туралы ақпарат берді.

«Форум дәстүрлі түрде мемлекет пен бизнес арасындағы негізгі диалог алаңы болып табылады. Біздің міндетіміз – машина жасау саласын одан әрі дамыту, оның бәсекеге қабілеттілігін арттыру және экспорттық әлеуетін кеңейту бойынша нақты шешімдер әзірлеу», – деп атап өтті Талғат Базарбеков.

Алдағы Форум аясында өнеркәсіптік кооперация мен жергіліктендіруді дамыту, роботтандыру мен цифрлық технологияларды енгізу, мемлекеттік қолдау шараларын жетілдіру, экспорттық әлеуетті кеңейту, инвестициялар тарту және білікті кадрлар даярлау мәселелері қарастырылады.

Пленарлық отырыстан бөлек, ұлттық өндірістік базаны нығайтуға бағытталған нақты бастамалар талқыланатын панельдік және секциялық сессиялар өтеді.

«Қазақстанның экспорттық-кредиттік агенттігі» АҚ презентациясы