«Қазақстан машина жасаушыларының одағы» ЗТБ алаңында өңірлік өкілдер мен сала кәсіпорындарының қатысуымен 2026 жылғы отызыншы онлайн-отырыс өтті.
Кездесу барысында қатысушылар шағын және орта бизнесті мемлекеттік қолдаудың жаңа тетіктерін, сондай-ақ заманауи машина жасау саласына мамандар даярлаудың халықаралық тәсілдерін қарастырды.
«Даму» кәсіпкерлікті дамыту қоры» АҚ Астана қаласы бойынша өңірлік филиалының директоры Светлана Назарюк кәсіпкерлерге арналған жеңілдетілген қаржыландыру мен субсидиялаудың өзекті құралдарын таныстырды.
Атап айтқанда, өткен жылдан бастап Қор субсидиялау құралынан жеңілдетілген қаржыландыруға көшкені атап өтілді. Негізгі құралдардың бірі – «Өрлеу» бағдарламасы, ол 7 млрд теңгеге дейінгі қаржыландыруды 12,6% мөлшерлемемен 10 жылға дейінгі мерзімге ұсынады. Бұл ретте өңдеу өнеркәсібі бағдарлама аясындағы басым бағыттардың бірі болып табылады.
Сондай-ақ қатысушыларға өңдеу секторын тікелей қолдауға бағытталған «Даму Өндіріс» бағдарламасы таныстырылды. Бағдарлама бойынша қаржыландыру 7 млрд теңгеге дейін 12,6% мөлшерлемемен беріледі және оны инвестициялық мақсаттарға да, айналым қаражатын толықтыруға да бағыттауға болады.
Тағы бір құрал – микро-, шағын және орта кәсіпкерлік субъектілеріне арналған пайыздық мөлшерлемені субсидиялау бойынша «Іскер Аймақ» бағдарламасы. Бағдарлама бойынша қаржыландыру көлемі 200 млн теңгеге дейін, ал пайыздық мөлшерлемені субсидиялау үш жыл бойы жүзеге асырылады. Бағдарлама барлық өңірлер үшін экономикалық қызметтің 18 негізгі басым түрін қамтиды. Әр өңір бойынша әкімдік «Атамекен» ҰКП-мен бірлесіп, өңірлік басымдықтарды ескере отырып, қосымша 6 ЭҚЖЖ айқындай алады.
Кездесудің екінші бөлігі заманауи машина жасау саласына кадр даярлау және WorldSkills халықаралық тәжірибесіне арналды.
«Халықаралық аккредиттеу және білім беру академиясы» ЖШС құрылтайшысы Татьяна Сороковик кәсіби құзыреттерді және техникалық және кәсіптік білім беру жүйесін дамытудағы WorldSkills қозғалысының маңызы туралы айтып өтті.
WorldSkills кәсіби құзыреттердің халықаралық эталоны ретінде қарастырылады. Ол кәсіптерге қойылатын талаптарды, практикалық дағдыларды, жабдықтарды, бағалау жүйесін және өндірістік тәртіпті салыстыруға мүмкіндік береді.
Мамандар даярлау мен өнеркәсіптің нақты қажеттіліктері арасындағы байланысты одан әрі күшейту қажеттілігіне ерекше назар аударылды. Заманауи өндіріс кадрларды даярлауға қойылатын талаптарды қалыптастырудың негізгі көздерінің бірі болуы тиіс, өйткені технологиялардағы, жабдықтардағы және еңбек функцияларындағы өзгерістерді ең алдымен кәсіпорындар байқайды.
Қазақстан WorldSkills қозғалысына 2014 жылы қосылды. Бүгінде WorldSkills қозғалысына әлемнің 90-нан астам елі қатысады. Оның негізгі мақсаттарының қатарында жастарды кәсіби даярлаудың үздік әлемдік тәжірибелерін анықтау, ТжКБ жүйесіне заманауи тәсілдерді енгізу, сарапшылар қауымдастығын дамыту және техникалық мамандықтардың беделін арттыру бар.
Машина жасау саласы үшін бұл тәсілдің маңызы ерекше. Себебі кәсіпорындарды технологиялық жаңғырту тек теориялық білімі бар ғана емес, сонымен қатар заманауи жабдықтармен жұмыс істей алатын және өндірістің практикалық міндеттерін шеше алатын мамандарды талап етеді.
Отырыс қорытындысы бойынша қатысушылар кәсіпорындар, білім беру ұйымдары және бизнесті қолдау институттары арасындағы өзара іс-қимылды одан әрі дамытудың маңыздылығын атап өтті. Мұндай ынтымақтастық өндірісті дамытуға жағдай жасауға және саланың технологиялық қажеттіліктеріне сәйкес келетін кадрлық әлеуетті қалыптастыруға мүмкіндік береді.
Қазақстан машина жасаушыларының одағы сала кәсіпорындарын қолжетімді қолдау құралдары, бизнесті дамытудың өзекті мүмкіндіктері және білікті мамандарды даярлаудың заманауи тәсілдері туралы ақпараттандыруды жалғастырады.
Шағын және орта бизнесті қолдаудың жаңа тетіктері презентациясы
