22 тамызда «Қазақстан машина жасаушыларының одағы» ЗТБ атқарушы дирекциясының директоры Талғат Базарбеков «КАМАЗ-Инжиниринг» АҚ-ның 20 жылдық мерейтойына арналған салтанатты іс-шараларға қатысты.

Кәсіпорынның мерейтойы бүкіл сала үшін маңызды оқиға. Бүгінде КАМАЗ-Инжиниринг Қазақстан машина жасауындағы флагмандардың бірі, сондай-ақ Қазақстан мен Ресей арасындағы табысты өнеркәсіптік ынтымақтастықтың айқын үлгісі болып отыр.

Іс-шара барысында қонақтар өндірістік цехтарды аралап, онда шығарылатын жүк және арнайы техниканың ондаған түрлерімен танысты. 20 жыл ішінде зауыт алғашқы өндірістік желілерден заманауи жоғары технологиялық өндіріс деңгейіне дейінгі жолдан өтті. Қазіргі таңда мұнда жылына 10 мыңға дейін көлік шығарылады, ал осы жылдар ішінде 20 мыңнан астам автомобиль өндірілді.

Талғат Базарбеков зауыт ұжымын Одақ атынан құттықтап, кәсіпорынның саланы дамытудағы маңызын атап өтті, сондай-ақ Қазақстан машина жасаушыларының одағы Басқарма төрағасы Мейрам Пішембаевтың құттықтауын жеткізді:

«Бүгінде КАМАЗ-Инжиниринг Қазақстанның барлық өңірлерінде сұранысқа ие жүк және арнайы техниканың кең модельдік қатарын шығарады. Өндірілетін өнім қазіргі заманғы сапа, қауіпсіздік және сенімділік талаптарына толық сәйкес келеді. Қызметіңіздің басты нәтижесі мыңдаған техниканы шығарумен ғана шектелмей, ұлттық өнеркәсіпті дамытуға, кадрларды даярлауға, жаңа сапа және сервис стандарттарын енгізуге қосқан үлес болып табылады», – деп атап өтті Талғат Базарбеков. 

«КАМАЗ-Инжиниринг» АҚ өндірістік қуаттарын белсенді кеңейтіп, техниканың жаңа түрлерін игеріп, дәнекерлеу, бояу және жинақтаудың заманауи технологияларын енгізуде. Кәсіпорында 300-ден астам маман жұмыс істейді, ал Алматы мен Астанадағы филиалдары сервис пен инженерлік шешімдерді қамтамасыз етеді.

Арнайы техниканың 40-тан астам түрін игеру және негізгі тораптар мен компоненттердің өндірісін жолға қою арқылы кәсіпорын жергілектендіру мәселелеріне ерекше көңіл бөледі.

Бүгінде КАМАЗ-Инжиниринг тек автомобиль шығаратын өндіріс қана емес, сонымен қатар кадрларды даярлау, жаңа технологияларды енгізу және халықаралық ынтымақтастық алаңы болып табылады. Зауыттың өндірістік алаңы 12 мың шаршы метрден асады, оған автожинақтау цехы, дәнекерлеу және бояу учаскелері, қоймалар мен логистика кіреді.

Қазақстан машина жасаушыларының одағы зауыттың қызметі отандық машина жасауды дамытуға және елдің өнеркәсіптік әлеуетін нығайтуға елеулі үлес қосып отырғанын атап өтті.