15–16 қазанда «Қазақстан машина жасаушыларының одағы» ЗТБ өкілдері – Басқарма төрағасының орынбасары Ерқанат Мақанов пен Атқарушы дирекция директорының орынбасары Махамбет Мендигалиев Батыс Қазақстан облысына барды. Сапар барысында олар мұнай-газ машина жасау форумына және ТШО, NCOC, КПО, Silleno және KMG PetroChem операторларының ашық есік күніне қатысып, өңір кәсіпорындарының өндірістік мүмкіндіктерімен танысты.
Өнеркәсіптік кәсіпорындарға сапарды ҚР энергетика вице-министрі Ерлан Ақбаров басқарды. Делегация құрамына сондай-ақ Қазақстан Республикасы Құрылтайының депутаттары, Батыс Қазақстан, Атырау және Қарағанды облыстары әкімдіктерінің, ҚР Энергетика министрлігінің, «ҚазМұнайГаз» ҰК» АҚ-ның, мұнай-газ операторларының және IMBС Халықаралық машина жасау орталығының өкілдері кірді.
15 қазанда делегация өңірдегі машина жасау саласының үш кәсіпорнына барды: «ОралАгроРемМаш» АҚ, «WEST OIL Инжинирингтік компаниясы» ЖШС және «Батыс Қазақстан машина жасау зауыты» АҚ. Одақ өкілдері өндірістік алаңдармен, шығарылатын өнімдермен танысып, компаниялардың басшылығымен кездесті.
Кәсіпорындар машина жасаудың әртүрлі бағыттары бойынша маманданған. «Оралагрореммаш» АҚ арнайы техника мен автоцистерналар шығарады. Кәсіпорынның өндірістік қуаты жылына 2 000 бірлікке дейін өнім өндіруге мүмкіндік береді.
«WEST OIL Инжинирингтік компаниясы» ЖШС мұнай мен газды есепке алуға арналған жабдықтарды, соның ішінде коммерциялық есепке алу тораптарын, телеметрия жүйелері мен елдің магистральдық құбырларында қолданылатын қысым датчиктерін шығарады.
«БҚМЗ» АҚ жылу алмастырғыш, сыйымдылық және жылутехникалық жабдықтар, оның ішінде көлемі 200 текше метрге дейінгі ірі технологиялық сыйымдылықтар мен сепараторлар өндіреді. Бұдан бөлек, кәсіпорын General Electric компаниясының газ турбиналарын күрделі жөндеу және сервистік қызмет көрсету жөніндегі лицензиясына ие.
16 қазанда Одақ өкілдері мұнай-газ машина жасау форумына және операторлардың ашық есік күніне қатысты. Іс-шара аясында отандық тауар өндірушілердің көрмесі ұйымдастырылып, онда кәсіпорындар өз өнімдерін таныстырды. Сондай-ақ сатып алуларға арналған тақырыптық сессиялар өтіп, қазақстандық өндірушілермен ынтымақтастық мүмкіндіктерін талқылау үшін операторлар өкілдерімен кездесулер өткізілді.
Кәсіпорындарды аралау және форумға қатысу өңірдің өндірістік мүмкіндіктерімен, сондай-ақ отандық өндірушілердің мұнай-газ саласындағы ірі тапсырыс берушілермен өзара іс-қимыл орнатуына арналған алаңдармен танысуға мүмкіндік берді.
Қазақстан машина жасаушыларының одағы өнеркәсіптік кооперацияны дамыту, қазақстандық кәсіпорындардың жеткізу тізбектеріне қатысуын кеңейту және отандық өнімді ілгерілету жөніндегі жұмысын жалғастыруда.
