26 тамызда «Қазақстан машина жасаушыларының одағы» ЗТБ «Атамекен» ҚР ҰКП Төралқасының Машина жасау және металл өңдеу комитетінің отырысын өткізді. Отырыс «Атамекен» ҚР ҰКП Төралқасының Машина жасау және металл өңдеу комитеті төрағасының орынбасары – Қазақстан машина жасаушыларының одағы Басқармасының мүшесі Теміржан Әбдірахмановтың төрағалығымен өтті.
Қатысушылар машина жасау саласындағы отандық тауар өндірушілерді (ОТӨ) «Энергетика және ТКШ жаңғырту» ұлттық жобасына тарту, сондай-ақ Қазақстандық тауар өндірушілердің бірыңғай тізілімін іске қосуға дайындық мәселелерін талқылады.
Қазақстан машина жасаушыларының одағы атқарушы дирекциясының директоры Талғат Базарбеков 2025-2029 жылдарға арналған ұлттық жобаны іске асыруға ОТӨ-ны тарту туралы баяндама жасады. Ол жалпы инвестиция көлемі 13,6 трлн теңгені құрайтын жоба энергетикалық және коммуналдық секторларды жаңғырту барысында отандық тауарларды, жұмыстар мен қызметтерді барынша пайдалануды көздейтінін атап өтті.
«Қазақстан машина жасаушыларының одағы Ұлттық жобаны бекіткен сәттен бастап отандық кәсіпорындарды тарту бойынша белсенді жұмыс жүргізуде. 150-ден астам өндірушіге сұраныс жолданды, 70 кәсіпорыннан 300-ден астам тауар позициясы бойынша ұсыныстар қабылданды», - деп атап өтті Талғат Базарбеков.
Спикер кәсіпорындар Ұлттық жобаны іске асыруға қатысуға жоғары қызығушылық танытып отырғанын айтты. Алайда, техникалық құжаттаманың, сызбалардың жетіспеушілігі және сатып алу көлемінің төмендігі тежеуші факторлар болып қала береді. Осы мәселелерді шешу үшін Одақ «ТКШ ҚазОрталығы» АҚ-мен бірлесіп бірқатар кеңестер ұйымдастырды, онда негізгі шаралар ұсынылды: жаңғыртудың ұзақ мерзімді жоспарын қалыптастыру, сатып алу туралы ақпаратты ерте ұсыну, шетелдік жеткізушілер үшін жершіліктендіруді талап ету, сондай-ақ салалық қауымдастықтардың сатып алудың электрондық платформасына қолжетімділігі.
Бұдан басқа, Одақ мемлекеттік органдармен бірлесіп Ұлттық жоба шеңберінде ОТӨ өнімдерін сатып алу тетігін реттейтін заңға тәуелді актілерді әзірлеу бойынша жұмыс жүргізуде. ҚР ӨҚМ Құрылыс істері және ТКШ комитетіне электрондық сатып алу платформасының жұмыс істеу ережелерінің жобасына ұсыныстар жолданды. Сондай-ақ сатып алу қызметіне ОТӨ қатысуын қозғайтын ТКШ саласындағы басқа да НҚА қарастырылуда.
Одақ «Атамекен» ҰКП-ға ҚР ҰЭМ Табиғи монополияларды реттеу комитетінен нысандардың тозу деңгейін, жабдықтар мен материалдарға қажеттілігін (номенклатура, жеткізу көлемі мен мерзімдері) болжау негізінде объектілерді жаңғыртудың ұзақ мерзімді жоспары туралы ақпарат алуға жәрдемдесу туралы өтініш білдірді.
Отырыс барысында «Qazindustry» АҚ-ның отандық тауар өндірушілердің тізілімін қалыптастыру және кәсіпорындарды скринингтен өткізу жүйесінің дайындығы туралы ақпараты ұсынылды. Құрал сатып алудың ашықтығын қамтамасыз етіп, адал өндірушілерді қолдаудың маңызды шарасына айналады.
«Qazindustry» АҚ Ірі кәсіпорындар айналасында ШОБ белдеуін құру дирекциясы басшысының орынбасары Жандос Теміровтың айтуынша, тізілім онлайн-платформада тіркеудің бірнеше деңгейін және ұсынылған деректерді цифрлық тексеруді қамтитын болады. Скрининг тоқсан сайын жүргізіліп, кәсіпорындар туралы ақпарат мемлекеттік деректер базасынан түсетін болады.
ОТӨ тізіліміне енгізілген кәсіпорындар жер қойнауын пайдаланушылардың, «Самұрық-Қазына» АҚ-ның және квазимемлекеттік сектор ұйымдарының барлық реттелетін сатып алуларына қатысуға, сондай-ақ мемлекеттік қолдау шараларына үміткер бола алады.
Отырыстың қорытындысы отандық кәсіпорындарды стратегиялық жобаларды іске асыруға тарту, сондай-ақ ОТӨ қолдаудың ашық тетіктерін енгізу бойынша жүйелі жұмыстың маңыздылығын растау болды. Қазақстан машина жасаушыларының одағы Ұлттық жобаны тиімді іске асыру және машина жасау саласы кәсіпорындарының мүдделерін дәйекті қорғау үшін мемлекеттік органдармен, бизнеспен және салалық қауымдастықтармен белсенді өзара іс-қимылды жалғастырады.
Анықтама үшін: Машина жасау және металл өңдеу комитеті «Атамекен» ҚР ҰКП Төралқасының консультативтік-кеңесші органы болып табылады. Оның алаңында саланы дамыту мәселелері қаралып, отандық кәсіпорындардың мүдделерін ілгерілетуге бағытталған бірлескен шешімдер әзірленеді. Комитетті Қазақстан машина жасаушыларының одағы Басқармасының төрағасы Мейрам Пішембаев басқарады.
