«Силлено» ЖШС-нің («ҚазМұнайГаз» ҰК» АҚ еншілес ұйымы) басшылығы «Қазақстан машина жасаушыларының одағы» ЗТБ-ның қатысушысы АтырауМұнайМаш зауытында болды.

Сапар барысында полиэтилен өндірудің болашақ зауыты үшін негізгі нысан болып табылатын пиролиз қондырғысына арналған бірегей ірі габаритті жабдықтарды дайындаудың ағымдағы мәртебесі таныстырылды. Өндірістік алаңдарда қазірдің өзінде келесі жабдықтарды жасау жұмыстары жүргізілуде:

1. Салмағы 700 тонна, биіктігі 51 метр болатын шыңдау колоннасы (Quench Tower);

2. Салмағы 1 470 тонна, биіктігі 101 метр болатын этиленді фракциялау колоннасы (Ethylene Fractionator).

Аталған екі қондырғы да полиэтилен өндірісінің орталық элементі болып саналатын пиролиз кешенінің құрамына кіреді. Қазіргі уақытта тапсырыстың орындалу деңгейі 50%-дан асты.

Сонымен қатар, зауыт су дайындау жүйесінде судан еріген газдарды жоюға арналған тағы бір маңызды элемент – деаэраторды дайындайды.

2024 жылғы қыркүйекте жергілікті өндірушілерді қолдау форумы аясында пиролиз қондырғысының ЕРС-мердігері – Tecnicas Reunidas және Sinopec Engineering Incorporation консорциумы АтырауМұнайМаш зауытымен ынтымақтастық туралы келісімге қол қойған болатын. Келісім нәтижесінде кәсіпорын полиэтилен зауытына арналған ірі габаритті жабдықтарды дайындауға тапсырыс алды.