Қазақстан Президенті Қасым-Жомарт Тоқаев 6 қараша күні John Deere компаниясының ТМД және Орталық Азия елдері бойынша президенті Чаба Лейкомен кездесу өткізді, деп хабарлайды Zakon.kz.

Мемлекет басшысы John Deere компаниясымен серіктестікті заманауи әрі тиімді ауыл шаруашылығы өндірісін дамытуға бағытталған табысты өнеркәсіптік кооперацияның жарқын үлгісі деп атады.

Президент John Deere компаниясының қазақстандық «Агромаш» зауытымен бірлесіп ауыл шаруашылығы техникасын жергілікті деңгейде өндіру жөніндегі шешімін қолдады.

Бұл ынтымақтастықтың нәтижелері қазірдің өзінде байқалуда – биылғы мамыр айынан бері 290-нан астам техника құрастырылған. Жыл соңына дейін тағы 100 бірлік шығарылады деп күтілуде.

Сонымен қатар Қасым-Жомарт Тоқаев АҚШ-қа жасаған сапары аясында 2,5 миллиард доллар көлеміндегі стратегиялық әріптестік туралы келісімге қол қойылуын құптады.

Аталған құжатқа сәйкес, келесі 5 жыл ішінде «АгромашХолдинг KZ» АҚ базасында кемінде 3 000 дана John Deere ауыл шаруашылығы техникасын өндіру, сондай-ақ кемінде үш сервис орталығын ашу және кадрларды оқыту жүйесін дамыту көзделген.

Бұған дейін Мемлекет басшысы Қазақстандағы Chevron корпорациясы директорлар кеңесінің төрағасы Майкл Уиртті қабылдаған болатын.